Поход Батыя на Русь

Поход Батыя на Русь

Отрывок о нашествии Батыя взят по «Никоновской летописи»—«Полное собрание русских летописей», т. X.

(Древнерусский  текст)

В лето 6745 (1237). Тоя же зимы приидоша от восточныя страны на Рязаньскую землю,  лесом, безбожнии татарове с царем Батыем и, пришедше, сташа первое станом ту Онузе, и взяша ю и пожогша ю. И оттоле послаша послы своя жену чародейцу и два мужа с нею ко князем Рязаньским, просяще у них десятины во всем: в князех, и в людех, и в доспесех, и в конех. Князи же Рязаньстии Юрьи Иньгваровичь и брат его Олег, и Муромский и Проньския князи, не пустячи их к городу, выидоша противу им в Вороножь, и отвещаша им князи: «коли нас не будеть, то все ваше будеть»... Послаша же князи Рязаньстии ко князю Юрью Володимерьскому, просяще себе помощи, или бы и сам пошел; князь же Юрьи сам не иде, ни послуша князей Рязаньских молбы, но хоте сам особь сътворити брань...

Рязаньстии, и Муромстии, и Пронстии изшедъше противу безбожных и сътвориша с ними брань, и бысть сечя зла, и одолеша безбожних исмаилтяне, и бежаша князи, кийждо во грады своя. Татарове же рассверепевше зело, наипаче начяша воевати землю Рязанскую с великою яростию и грады их разбивающе, и люди секуще, и жгуще, и пленующе. И придоша окаяннии иноплеменницы под столный их град Рязань, и оступиша град их столный Рязань месяца декабря в 6 день и острогом оградиша его; князи же Рязанстии затворишася во граде с людми, и крепко бившеся и изнемогоша. Татарове же взяша град их Рязань того же месяца в 21, и пожогша весь, а князя Юрья Ингворовичя убиша, и княгиню его и иных князей побиша, а мужи их, жен, и детей, и черньца, и черници и ерея емше, овых  разсекаху мечи, а других стрелами состреляху и во огнь вметаху, а йныа емлюще  вязаху, и груди возрезываху, и жолчь вымаху... Много же святых церквей огневи предаша, и монастыри и села пожгоша, а имение их поимаша.

Потом же татарове поидоша на Коломну; князь же великий Юрьи Всеволодичь посла противу им сына своего князя Всеволода из Володимеря) и с ним князь Роман Ингваровичь Рязанский с силою своею, а воеводу своего Еремея Глебовичя послал князь велики Юрьи наперед в сторожех, и снястася  со Всеволодом и с Романом Ингворовичем у Коломны, и ту оступиша их татарове, и бысть сечя зла зело, и прогнаша их к надолобом , и ту убиша князя Романа Ингворовичя Рязанского, а у Всеволода Юрьевичя воеводу его Еремея Глебовичя убиша, н иных много мужей побита, а князь Всеволод в мале дружине прибеже в Володимерь, А татарове поидоша к Москве, и пришед взяша Москву, и воеводу их убиша Филипа Нянка, а великого князя Юрьева сына князя Володимера руками яша, а люди вся избиша от старость и до младенец, а иных в плен поведоша, и много имениа вземши отьидоша.
   Князь велики же Юрьи Всеволодичь слышев то... и остави в себе место в Володимери со владыкою князя Всеволода и Мстислава  и воеводу своего Петра Ослядюковичя, а сам иде за Волгу з братаничи  своими: с Василком Констянтиновичем, и со Всеволодом Констянтиновичем, и с Володимером Констянтиновичем и сташа станы на Сити, жда к себе братью свою князя Ярослава Всеволодичя и князя Святослава Всеволодичя  со воинствы их, а сам начя собирати воинство, а воеводьство приказа Жирославу Михайловичю.

А татарове в то время приидоша к Володимерю месяца февраля в 3 день, во вторник преже мясопускъныя недели, на память святаго Симеона богоприимца; володимерци же со князи своими и с воеводою-Петром Ослядюковичем затворишася во граде. Татарове же приидоша к Златым воротом, водяще с собою княжичя Володимера, сына великого-князя Юрья Всеволодичя, и начата вопрошати, глаголюще сице: «есть ли во граде князь велики Юрьи?» Володимерци же начаша стреляти на них. Они же реша: «не стреляйте», и приидоша близъко вратом, и показаша им княжичя их князя Володимера, сына Юрьева, глаголюще: «знаете ли сего княжича вашего?» Бе бо уныл лицеи, и изнемогл: бедою от нужа. Всеволод же и Мстислав стояша на Золотых воротех и познаста брата своего Володимера. О умиленое брата видение и слез достойно! Всеволод же и Мстислав з бояры своими и все гражане плакахуся ...